呒淘成。好容易等到天亮快，难末算胧着哉，勿壳张故歇醒转来，身浪才有点热，想必外头去受仔风寒洛，连搭心里末怕烦，嘴里末干燥，吃茶才勿杀渴格，格末叫难过得来！奴末实梗，阿好勒介？”阿金道：“多谢，我倒好格哉。晏歇点，大先生阿要请郎中看看，吃一帖药罢？”宝玉道：“奴格毛病，只怕郎中才勿识货格，吃差仔药，倒要勿局。格落让俚吃希，像实梗，一样会好格。”

    阿金听了，明知他的病根已在梦中泄漏，却不去说穿他，只把隐语去打动他，让他自己招出来，托我办这件事，方好于中取利。故等阿珠走出房去，又向宝玉说道：“大先生肚里阿有啥难过佬？勿然末，寻常格寒热小毛病，请有名气格郎中来看，有啥勿识货介？”宝玉叹了一口气，答道：“奴肚里是呒啥，倒是心里难过，说勿出，话勿出，横勿是，竖勿是，甩末甩勿开，笃亦笃（笃即丢字之意）勿落，掇牢勒心浪仔。奴自家才解说勿出为啥佬，格落请仔郎中，也未必见得懂格。”阿金道：“我郎中末勿做，格病倒有点懂格，而且有一个丹方勒里，阿要试试看，包蛮灵验格！”宝玉道：“瞎说，登勒奴身边仔长远，奴从来听见说歇。”阿金道：“前头用勿着，我说俚作啥呢？”宝玉道：“既然勿是瞎说，格张丹方叫啥格名堂嗄？”阿金道：“自然有名堂格，并且有两个得来。据说是仙人传下来格，叫定心丸，亦叫如意丹，专门吃格种毛病格。故歇我想着仔，格落叫试试呀。不过吃好仔病，哪哼格重谢我介？”宝玉道：“真格医得好奴格心病，随便要奴谢啥，奴呒不勿肯格。倒是说格丸药，药材店里阿有得买格介？”阿金道：“买虽呒买外，格两样药味，我记得清清爽爽勒里。”宝玉道：“倒背（读倍）拨奴听听看，奴有几味药也有二毫半懂格。”阿金本无方子，那有药味？不过借此打动宝玉，使他把心事实言。今问我是那几样药，幸而我晓得药名，不防逞嘴胡说，将月山的姓多说几个，谅他聪明伶俐，必然辨得出滋味。遂答道：“大先生听好仔：第一味是犀黄；第二味是大黄；第三味是天竺黄；第四味是人中黄；第五味是黄耆；第六味是黄目菊；第七、第八、第九味是黄连、黄芩、黄柏，加入黄明胶糊丸，用黄齑水一碗，法丸如梧桐子大，或当作煎方亦可。格张方子，样样才是清凉药，写心经、肾经格火格，想阿好呢勿好？”宝玉听阿金背完，全是“黄”的药名，分明话里有因，先已参透我的心事，便笑道：“说格药，样样才是‘黄’格，啥落生地黄搭仔熟地黄倒勿用介？”阿金也笑道：“格服定心丸，如果吃得对末，自然再加熟地黄补进去，勿然要嫌俚滋腻格。至于生地黄是勿补格，前头末用得着。故歇下元虚哉，除脱仔熟地黄，有啥格补药吃介？倘使胆小末，只要用一个乌梅、三钱原金斛，怕俚作啥嗄？”

    宝玉听他说用熟地黄，是指我旧日相熟的黄月山，除他没有别人了。若胆小则用个乌梅，“梅”与“媒”声音相同；原金斛者，是原差我阿金之意。足见阿金善于词令，编造出许多药名，甚为切当，前来试探我的心事。真是一服绝妙的定心丸。且他又毛遂自荐，我亦何必瞒他，自寻烦恼？况本因此事难以启齿，故末相托；今既他凑趣上来，不说更待何时？遂在被中坐起，凑到阿金耳边，低低相告道：“奴实勿相瞒，自从吃仔永贞格吓头，奴心里一径懊躁煞，倒也想着俚。故歇永贞死仔，虽则末蛮快活，勿知哪哼提醒仔奴格心事，想到仔月山身浪。不过哪哼会猜着格介？”阿金道：“阿曾做歇梦佬？”宝玉道：“今朝天亮快，梦是做歇格。奴梦头里格事体，勿见得会晓得勒海。”阿金道：“我告诉仔罢，心里向格事体，是自家梦里说出来格，勿然我既勿是仙人，亦勿是肚皮里格蛔虫，哪哼能够一猜就着介？”宝玉道：“倒有一样勿好：奴前头已经搭月山割断，故歇再去请俚，只怕俚勿肯来末那处嗄？格落奴勒里难过呀。”