搭，干娘去问俚末哉。”于是宝玉归房，即唤管帐的上来问话。那管帐的就拿了一本皮肉帐，几包洋钿钞票，以及各店家派来的帐，上楼一一交明清楚。宝玉先将洋钿、钞票点了一点数，计共只有九百余元；再把帐薄翻阅一遍，看到总结，除几处收过外，尚少千元有零，大约他们知我出门，故未送至，否则断不会这样的。又看那所欠各店之帐，如银楼、珠宝、绸缎、洋货、菜馆等项，约需二千多元，其余零星各款，也需数百元光景，一并计算，非有三千不可。幸得我赴宁一次，早作整备，不然，势必要变卖东西，填补这个亏空了。

    宝玉正在心中转念，管帐的又禀道：“大先生去仔半个月，格格贼倒前日捉牢格哉！公堂浪审仔一转，打仔一顿屁股，官问俚赃窝藏勒落里，贼说用脱仔一大半，只剩两只金锭、十几个金四开，存勒苏州亲眷人家，难末官差两个差人，昨日押仔俚到苏州吊赃去哉。”宝玉道：“闲话少说，奴问格格贼名字叫啥介？阿曾看见俚？哪哼样式一个贼？登难落里搭捉牢格呢？”管帐的道：“勿然我勿晓得，到仔前日夜快，包打听格伙计到间搭来关照，说格格贼拨倪勒虹口捉着格，皆为俚形迹可疑，细细教一拍一问，落里晓得就是间搭格件事体，马上关到俚捕房里去。名字叫卜德智，明朝八点钟解公堂，格落差我来拨信格，难末我谢仔一块洋钿报信钱。到明朝去看审，看格格贼格样式，身体末生得琐小，胆子倒蛮大格，听俚说偷仔物事，到苏州一埭，还是捉牢格上一日回上海格来。”宝玉听了，叹了一口气道：“阿别去说俚。倒是偷去格千把洋钿，故歇领点转来，除脱谢仪使费，勿知样有一二成。”阿金在旁插嘴道：“大先生，譬譬罢！譬如呒不，才是多格。有格人家，歇仔一年二年，案才勿曾破，亦秃多勒浪，倪总算额角头高格哉！”

    宝玉点点头，打发了管帐的下去，便向阿金、阿珠交代道：“故歇格节帐大勿好，想必倪出仔一埭门佬，加二倪转得晏（读俺）仔两日，弄得局局促促，只好唔笃两家头，脚晦气格哉，唔笃今朝拿奴格片子，马上到各家去走一埭罢，名说是关照，请俚笃来白相，其实就是讨帐，俚笃终明白格。切勿要穷凶极恶，搭俚笃板面孔，即使真真勿有，一时拿勿出，俚亦叫呒设法，扮勿转大老官落呀！唔笃倒要对俚好说好话，使得俚难为情，良心发现，自然过节弄着仔铜钿末来还我哉，勿然，逼杀俚也呒不，倒弄得下埭勿好见面，倪格帐仍归落空，还落一个凶名声勒外头，阿是勿犯着介！想对呢勿对佬？”阿金笑道：“对是蛮对，不过便宜（读热）点格班漂匪，好得倪拾（读疾）着一注外快勒里，勿然，是倪照实梗，先要尴尬哉！”阿金道：“讲哉，辰光已经勿早，将近四记钟哉，阿要走罢！”宝玉道：“唔笃两家头，合坐仔奴格包车勒去，就快哉。”

    两人答应，立刻拿了宝玉名片，下楼唤了自己车夫，交代到某处某处，匆匆上车而去。直到晚膳时候，方始归家覆命，只收得二百余元，先交宝玉收了，然后慢慢的细说道：“倪走仔十几家，只有赵老笃、钱老笃，总算结清格，孙大少笃、李三少笃，收着仔一半；归搭周老笃、何大少笃、郑二少笃、王三少笃，才说明朝送得来；还有金、魏、陶、姜四家，才推头勿勒屋里，明朝自家来呀；单剩两家小户头，来勿及去格哉。横势有几家勿送得来，倪还要跑一埭，终归罢勿成格。”宝玉道：“随便送来勿送来，唔笃勿必再去讨哉，小户头末看得见格，白走俚作啥嗄！凭俚笃格良心罢，倒是有六七家节盘，唔笃板要去送格，带道请俚笃过来吃酒，说奴勒里牵记佬。”二人连称晓得。

    次日一早，备齐六七副盘，每家四色，叫鳖腿等挑了，跟着二人到各家分送，兼请众客来饮酒，赏玩中秋佳节。这都是堂子里的老例，毋庸细表。午后两人归来，回覆宝玉，说各家盘已送毕，有的全受，有的受了一半，