一径勒苏州做生意，终归弄勿落，格落到仔三月里，要想来投奔俚格，倒是我勿认得俚格面孔，俚勿认得我格形状，亦呒不熟人指引通信，所以我敢走得去，恐怕俚当我打脱帽，送我到巡捕房里去末哪哼嗄！后来亏得碰着仔一个朋友，荐我到间搭来做香火，真真呒设法呀。”阿金道：“我还要问，‘胡宝玉’三个字，哪哼拨晓得格呢？”香火道：“我起初只晓得林黛玉，是倪娘告诉我格。以后娘死仔，亦听见别人说，胡宝玉就是林黛玉改格名字，改仔好几年哉。轧实到底阿对格佬？”阿金听了，仍不说穿，又道：“对是对格，不过搭宝玉啥称呼？关点啥格亲？末姓啥叫啥？原底仔啥场化人？说得明明白白，我替去通信阿好？”香火急忙称谢道：“多谢多谢，真真菩萨保佑，今朝碰着阿姐格种好人，肯搭我通一个信，得能够吃一碗现成饭，我终勿忘记，供长生禄位格。”阿金道：“太噜哩噜嗦哉，毫燥点说罢。”

    香火方一一诉说道：“我姓杜，叫阿二，原本浦东人，登勒苏州毛十年，格落口气变格哉。倪爷叫杜式明，做箍桶匠格，老早死脱仔末，倪娘守勿住，拿我抛脱勒屋里，就姘仔一个姓潘格。当时我小来，才勿晓得。直到后来隔仔十几年，倪娘回到屋里，难末说起勒上海，养过一个囡鱼，故歇卖拨勒堂子里，取名叫林黛玉，我得着一笔身价，终算老死盘缠有格哉。想，照实梗说法，我搭宝玉，虽勿是同一个爷，到也是一个娘养出来格，总算称得嫡亲兄妹，不过碰歇头。扳要伸说明白仔末，好投奔俚。”阿金道：“吓有实梗格情节勒海！格末老实对说仔罢，格位就是宝玉先生。我末登勒俚身边，伏侍俚格，停歇替传仔信，俚听勿听，认勿认，才勿关得我事，碰自家格额角头，怪我说得勿道地就是哉。”

    两人说话才毕，那边阿珠走过来催道：“格香火倒少格，香烛末勿点，阿是讲闲话讲忘记哉！阿金姐，格胃口真好，格种人，搭俚攀谈啥呢？”阿金置之不答，仍交代香火道：“先去点香烛罢，让倪先生拜过仔佛，我好传格句闲话。”香火阿二唯唯答应，登时将香烛点好，请宝玉拜佛。宝玉正在那里疑惑，因见阿金与香火讲了良久的话，无如立得稍远，一句都没有听清楚，正不知所为何事，大约这个香火与阿金素来认识的，怎想到是自己一母所生的哥哥？

    闲文少叙。是时宝玉拜过了佛，看香火化过了元宝、钱粮，正待向各处随喜一回方始回去，阿金忽将他衣服拉了一拉，凑着耳朵，低声相告，将方才香火杜阿二所说的情由，细细诉了一遍。宝玉听说娘已去世多年，不免洒了几点眼泪，因他说话对同，知非捏造，便道：“有介事格。奴小格辰光，亦听见倪阿妈讲歇细底，前头养过两个男，大格老早就死，第二格勒浦东乡下，虽则末勿见过，算上去年纪亦对格。故歇去搭俚说，叫俚明朝到奴屋里来末哉。”旁边阿珠插嘴道：“大先生，终要当面盘驳清爽格，皆为世界浪坏人多，作兴有假冒格哩。”宝玉道：“奴亦实梗想呀，格落叫俚屋里来，好细细教盘问俚，勿然，今朝一时头浪，冒冒失失，奴问俚格闲话，拿要紧格倒漏脱仔介，以为阿差呢勿差？”阿珠点首称是。

    阿金于是回覆了香火阿二，叮嘱他明日来家相认，今天不必面谈，以免被他人知晓，失了体面。交代已毕，即同宝玉出了正殿。宝玉取出金表一看，已有一下多钟了，觉得腹中有些饥饿，故向各殿略略瞻仰，便出寺门上车而归。到家之后，宝玉并不疲倦，复吩咐马夫傍晚再来，八点钟要往虹口去看马戏的，马夫应命而去，不表。

    再说秀林闻干娘今夜往观马戏，也想见识见识，托阿珠向宝玉一说，宝玉应允。秀林自是欢喜，又来问龙华的风景，宝玉略述几句。阿珠忽抢着问道：“大先生，勒车子浪讲龙华古典，讲完格来！”宝玉道：“性急，奴肚里也饿煞勒里，让奴吃过仔饭勒，好讲得动得来。”阿珠